Kwa Nini Mungu Haonekani Moja kwa Moja Kwetu Kuthibitisha Kwamba Yupo?
Wakati mwingine, marafiki zetu wasioamini hujiuliza kwa nini Mungu haonekani kwa kila mtu duniani na kuthibitisha waziwazi kuwa Yeye yupo? Kwa nini hajioneshi kwa kila kizazi cha wanadamu ili kila mtu duniani aweze kumuona na kumsikia Yeye na kujua bila shaka kuwa Yeye ni halisi? Baada ya yote, kulingana na Biblia, Bwana alijitokeza “kwa Ibrahimu, kwa Isaka, na kwa Yakobo, kama Mungu Mwenye Nguvu” (Kutoka 6:3), na Aliongea “na Musa uso kwa uso, kama vile mtu anavyoongea na rafiki yake” (Kutoka 33:11). Kwa hivyo kwa nini hafanyi hivyo kwa kila mtu mwingine?
Wakristo wanakiri waziwazi kwamba kuna mambo mengi maalum ambayo hatujui kuhusu Muumba wa Ulimwengu ambaye ni wa milele, asiye na mipaka, mwenye nguvu zote, na anayejua kila kitu, ikiwemo kwa nini anafanya au hafanyi vitu fulani. “Maana mawazo yangu si mawazo yenu, wala njia zenu si njia zangu, asema Bwana. Kwa kuwa kama vile mbingu zilivyo juu kuliko dunia, ndivyo njia zangu zilivyo juu kuliko njia zenu, na mawazo yangu kuliko mawazo yenu” (Isaya 55:8-9). Hakuna njia ya kujua mawazo ya Mungu isipokuwa Yeye aamue kufunua baadhi ya njia Zake kwetu. Musa aliandika: “Mambo ya siri ni ya Bwana Mungu wetu, bali mambo yaliyofunuliwa ni yetu sisi na watoto wetu hata milele, ili tupate kufanya maneno yote ya sheria hii” (Kumbukumbu la Torati 29:29, msisitizo umeongezwa). Je, Mungu amefunua wazi kwa nini hajajitokeza kwa kila binadamu katika historia ya ulimwengu ili kuwathibitishia uwepo wake? Ukweli ni kwamba, Mungu hajashughulikia swali hili waziwazi katika Biblia; lakini Yeye hujifunua vya kutosha kwetu kuhusu Yeye na uumbaji Wake ili tuweze kutoa hitimisho lifuatalo.
Kwanza, hata kama Mungu angejitokeza moja kwa moja na kuzungumza na kila mtu duniani, si kila mtu angeamini katika Yeye. Baada ya yote, Mungu alijifunua Mwenyewe kwa wanadamu katika karne ya kwanza (Yohana 1:1,14), akiongea kama “hakuna mtu aliyewahi kuongea” (Yohana 7:46) na akifanya miujiza ya aina zote, ikiwemo kutembea juu ya maji, kuponya vipofu, kuunganisha sehemu za mwili zilizokatwa kwa mguso wa mkono Wake, na kufufua wafu. Ndiyo, hata ingawa Yesu alimfufua Lazaro kutoka kwa wafu, na Yeye Mwenyewe alirudi kutoka kwa wafu, wengi bado hawakumwamini Yeye (Yohana 11:45-53; 12:9-11)—walimkataa Yeye licha ya ukweli kwamba Yeye (Mungu) alijitokeza kwao uso kwa uso.
Mnamo mwaka 2012, mtaalamu maarufu wa kutoamini Mungu, Richard Dawkins, aliulizwa kuhusu kutoamini kwake kwa Mungu.Aliulizwa Mahususi,“Je, kwa njia yoyote, ni uthibitisho gani, ambao ungebadilisha mawazo yako?” Aliitikia haraka kwa kusema, “Hilo ni swali gumu na la kuvutia sana kwa sababu, ninamaanisha, nilikuwa nafikiria kuwa kama kwa namna fulani, unajua, Yesu mkubwa mwenye urefu wa futi 900 na sauti kama ya Paul Robeson ghafla atembee na kusema, ‘Nipo hapa nipo hapa, lakini hata hivyo, kwa kweli wakati mwingine najiuliza kama hilo lingefanywa…”1 Ingawa Dkt. Dawkins alikatishwa, aliweka wazi hisia kwamba hata kama Mungu angejitokeza kwake, akichukua umbo la “Yesu mkubwa mwenye urefu wa futi 900” na sauti yenye nguvu, hata tukio hilo pengine lisingemshawishi.
Kwa kusikitisha, si tu kwamba watu wengi wangeendelea kutoamini kama Mungu angejitokeza kwao, wengi zaidi wangekataa mamlaka Yake juu yao, hata kama wangekiri uwepo Wake. Yuda alikuwa mmoja wa marafiki wa karibu na wanafunzi wa Yesu. Alikuwa mweka hazina wa kundi hilo. Lakini, alikuwa mwizi ambaye hatimaye alimsaliti Bwana. Mtu anaweza kusema kwamba Yuda hakuwahi kuamini (angalia Yohana 6:60-71), ambalo lingeongeza uhalali wa hoja yetu ya kwanza. Lakini kama kweli aliamini Yesu kuwa Mwana wa Mungu, basi mwishowe alichagua pesa badala ya Bwana; alichagua dhambi badala ya Mwokozi. Yeye hakuwa, na hatakuwa, wa mwisho kufanya uchaguzi kama huo. Kwa kweli, kabla ya mwanadamu yeyote kumjua Mungu na baadaye kukataa mapenzi Yake, kulikuwa na idadi ya viumbe wa kimbinguni waliokataa mapenzi Yake. Ni viumbe walioumbwa wa kimbinguni (Wakolosai 1:16) ambao walimjua (na wanamjua) Mungu, lakini kwa hiari walikataa mapenzi Yake kwao (2 Petro 2:4; Yuda 6). Hivyo ndivyo Shetani alivyoasi na kuwa mwovu dhidi ya Mungu wa mbinguni kiasi kwamba hata alijaribu kumshawishi Mungu atende dhambi (Mathayo 4:1-11). Usikose kuelewa, kukubali uwepo wa Mungu hakumaanishi moja kwa moja kumpenda Yeye na kutii mapenzi Yake (Mathayo 7:21-23). Kwa kweli, asiyeamini Mungu Dan Barker alionesha uasi kama huo katika mjadala wa Butt/Barker aliposema kwamba, ingawa anaamini Mungu “hayupo,” “ikiwa kuna jehanamu na kama wasioamini Mungu watafika mwisho wa maisha yao na kugundua, ‘Ndiyo, nilikosea, Mungu yupo….’ Basi ningemwambia Mungu huyo…‘nenda jehanamu…. Huna heshima yangu.’”2
Tatu, Mungu tayari amempa kila mtu anayewajibika duniani kiasi cha kutosha cha ushahidi ili afikie maarifa ya uwepo Wake. Uhalisia wenyewe wa Ulimwengu wa kimwili (ambao hauwezi kujitokeza kutoka kwenye kitu kisicho na kitu; wala si wa milele),3 unashuhudia kuwepo kwa Muumba. “Maana kila nyumba hujengwa na mtu, bali yeye aliyevijenga vitu vyote ni Mungu” (Waebrania 3:4). Kwa hakika, “Tangu kuumbwa kwa ulimwengu sifa zake zisizoonekana zinaonekana waziwazi, zikifahamika kwa vitu vilivyofanyika, yaani, uweza wake wa milele na Uungu wake; hata wao hawana udhuru” (Warumi 1:20). Tangu wakati wa Adamu na Hawa, wanadamu wamepewa fursa ya kuona jinsi “vitu vilivyofanyika” vinavyoshuhudia kwa uwazi kabisa kuwepo kwa Muumba mwenye nguvu asiyeonekana. Kama vile mtunga zaburi alivyoeleza, “Mbingu zinatangaza utukufu wa Mungu; na anga linahubiri kazi ya mikono yake. Siku hutamka habari na siku, usiku hutangaza maarifa. Hamna lugha wala maneno, sauti yao haisikiki. Urefu wao umeenea duniani kote, na maneno yao mpaka mwisho wa ulimwengu” (19:1-4).
Kwa hiyo kwa nini Mungu haonekani kwa kila mtu duniani ili kuthibitisha kwamba Yeye yupo? Jibu fupi ni: “Kwa sababu Yeye, kama Mtawala mwenye mamlaka wa Ulimwengu, anachagua kutofanya hivyo.” Huenda tusijue sababu zote za Mungu kwa nini Yeye hachagui kujitokeza mwenyewe kwa kila mtu duniani katika kila kizazi, lakini uamuzi kama huo kutoka kwake hauoneshi (1) kwamba Yeye hayupo, au (2) kwamba Yeye si mwenye huruma na haki. Ukweli ni kwamba, Mungu siku zote amempa mwanadamu ushahidi wa kutosha wa kuwepo Kwake—kwa kiwango kwamba mtu yeyote anayekataa kukiri uwepo Wake hana “udhuru” (Warumi 1:20).
TANBIHI ZA MWISHO
1 “Q&A: Religion and Atheism” (2012), ABC Australia, April 9, http;//www.abc.net.au/tv/qanda/txt/s3469101.htm, emp. added.
2 Kyle Butt and Dan Barker (2009), Butt/Barker Debate: Does the God of the Bible Exist? (Montgomery, AL: Apologetics Press), emp. added.
3 Jeff Miller (2013), “Evolution and the Laws of Science: The Laws of Thermodynamics,” Apologetics Press, /apcontent.aspx?category=9&article=2786.
REPRODUCTION & DISCLAIMERS: We are happy to grant permission for this article to be reproduced in part or in its entirety, as long as our stipulations are observed.
